El color del gran - Museo della civiltà contadina Peretto

- Museo della civilta' contadina - Dino Peretto -
Vai ai contenuti

El color del gran

Racconti



Michele Brunelli

El color del gran

El gran el gavéa i culuri del sol
róso 'ntei tramunti
xalo 'ntei mexodì d'istà

el gavéa el color de la vita
el gavéa el color
de la sana tóxa de canpagna in fior
de la xente 'ntei canpi drio cantar
del suar
del suor
de tanti brasi, sugà da na tenpestada
insieme co le speranse de aver pan

el gavéa el color de l'ostinathion
de riscominsiar lavorar:
ogni volta da nóvo,
int' un ripètarse continuo,
come l'antigo saver pasà de pare in fiol
par tenpi eterni

El gran el ga i culuri del sol
róso 'ntei tramunti
xalo 'ntei mexodì d'istà

el ga el color de la vita,
de na pianta vegnùa sù bela forte,
sana,

el ga el color
de la natura carga de fruti,
de na pianta vegnùa sù svelta
robusta,
sensa fadiga

jutà da le sostanse moderne

el ga el color trasparente de l'indifarensa
che magnémo el pan quando che lo gavémo in tola

el ga el color
dei canpi
sofegài dal sfalto e dal seménto,
de un móndo che 'l va masa in presa
'ndo che 'l fior
'ndo che 'l fiol
el ga perso le só raixe
el sin' vergogna;
'ndo che i fiuli
no i parla la léngua dei noni,
come foresti in tera sua,
i ga inparà vergognàrsene.

El ga el color de l'indifarensa
che magnémo el pan
par no ricordarse che xèrimo contadini.


Il          tempo          passa,          l'azione          resta.



Torna ai contenuti